ماعد انعيد الكره **
ونا فالغلا مليوع مية مره ** حتى مجاملة ماعد
**
ماعد اندير جديد *
حتى لوبنانى عزم كى الحديد *
وناظر وذايق مالغلا تهديد
واخذ على ميل الزمان وزره *
ماينغبى بوزيد هو بوزيد
لابس سوا تما الراس امعره *
وبلازناد ماتقدر اتصادر صيد
حتى ونت تخبر فالوطا والجره *
وان مانك خبير ودقرتك فى ليد
خشوش الخلا واعر وفيه مضره *
**
ماعد جديد انديره
ولاعاد شاقى بالقديم وغيره *
عندى العقل دالنه اظروف كثيره
ايغدن ابهن راضى وكامى سره *
حتى وهو مخليه الزمان دميره
انزال عالدبر يردع وحامل شره *
واخطاه وين مايبطن انقولوا خيره
مرات ذوقته للقير ذوقه مره *
ولا عمر تمت صافيه الشعيره
اصداف طل ما ريت الحسك يّذره *
واللى تقرضه بالك اتجيه شكيره
واللى تشكره بالك اتعيبه مره *
وقولك ولد لجواد كيف ايعيره
عناه وخلا جيبه ولبس امهره *
الجود فى نظافة معدنه وضميره
ويعرف بلاتوصيف مايتوره *
والفارس انما تما جواده خيره
حتى وهو قديم ركوب خيل ايضره *
**
ماعد انعيد الكره **
ونا فالغلا مليوع مية مره ** حتى مجاملة ماعد
للشاعر / محمد الشيخي
كلمات دلالية : قصيدة ، قصائد ، شعر شعبي ليبي