ضاع الغلا

ضاع الغلا
ماعد عليه حسوفة امسامح عزيز وكل حد بظروفه
ضاع الغلا
ماعد انقول اخسارة انسيته وطفيت يا رفيقى ناره
وهى قبل ما كانت الا وهوارة بين الضلوع املهلبة فى جوفه
وركح وشاقى صاحبك بصغاره هذول هم اللى ديمة عليهم خوفه
من ضيم الزمان وبرمته وامراره ودنيا قديمة غير مى مكشوفه
مبنية على ساس الخيا غداره انظرها عليش امقمطة ملفوفة
عاش فى زمان امزاينة واتجاره لا يبيع لايشرى اقطع مصروفه
وتمه غريب ومى غريبة داره بين ناس تدعك كل حد بكتوفه
ايسمو السرقة كولسة وشطاره والطيب احذاهم قرعته ملهوفه
نين من عملهم ناقصات امطاره الوطن صاف لابدرى ولاصيوفه
ولا يفهموه انكان دار اشارة ولا اقدرو يقروهن صحيح احروفه
امعاهم برم شور اليسار مداره كى من اركب فى طايرة مخطوفة
وشيل احمول اثقال فوق اعباره شالهن وما فى لرض حط اكفوفه
حلف عالنظاف ايكمله مشواره لاجل الحى نهايته امعروفه
خذا درب قايد نيرات افكاره ما يسيبه لعند قطر الصوفه
دلال خاطرى غاشى اجواد عصاره اشراف اصل مافيهم ولاامعيوفه
وشيخم اجوادى ذايعات اخباره على كل راقد ريح عنده روفه
وامدقل ان صار ادعاك ما يذاره ايجى فوق سابق عالبلا امحدوفه
عليهم اتحوش الضان والخواره اللى بكل صيفه طيبة موصوفه
فى وطن زاهى منفلت نواره عقاير عفا من قبل مى مصدوفه
بعيد عالبحر والدوج والسمساره لاضى فيه ولا اطرق مرصوفه
وايدير بيت عشرينى وسيع مداره ايخيل فيه عبادى اطرح لضيوفه
قدامه اربط عاتى لذيذ مساره ايدير ليا زامن الحرب ادفوفه
وفيه بوجبين ابيض ايدير شراره ان تاق القمر يلاه ايسير اخسوفه
كلام منتهى ماعاد منه ماره ولا فالمنام انجاه نوم ايشوفه  

للشاعر عبد القادر بكار 

ياعزيز علينا


ياعزيز علينا ++ امعاك فالغلا ياما اسنين اشقينا
وجرينا على لمة الشمل جرينا ++ غير جرى عالفاضى بلا مردود
ولاعاد من لوعة غلاك ابرينا ++ جرحك تعورض والدواء مفقود
خليت خاطرى طول الزمان جرينة ++ اتريد تقتله ظنك بلا بارود
وعندك بعد مالن عليه اسنينا ++ ابقى من احساب الناس مو معدود
ولانك امفرز زينتا مالشينة ++ ولو شاغلك لاعد عليه انشود
صيوره ايموت وما سلك فى دينه ++ حتى ان طالبك مالا عليك اشهود
ورا الموت لو فيدك ولو فى دينا ++ هو والحياة والرزق عالمعبود
احسب احساب الوقت يا غالينا ++ بما دار فى غيرك عليك ايعود
خلانا على هامش حياة مدينة ++ عكس الحضارة رادين اردود
وفيها مشايخ جادين القينا ++ مايفرزو لجواد مالهبود
وحتى اجداب الوطن شارك فينا ++ وساب سعينا تما طعام اصيود
وتمو ذوايح يخدمو فالمينا ++ اكبار نجعنا ملا اعطاب اسعود
ما اتقول رينا عز فى ماضينا ++ بغاشى عليه اتحوش عيت القود
ولابيت واسع للضيوف بنينا ++ خايل ايبان اتقول قصر اهنود
وحتى عطيب الناس مستشوينا ++ فى وطنا تاريخنا مجحود
ما اتقول شى حق لبلاد عطينا ++ وين ما قليد الروم جاء بحشود
ولافيه رجالة ابهم تطرينا ++ كى بوالضباع وكيف بو بنود
وخايف مع طول الزمان ايجينا ++ زمان يقعدو فيه لسلام ايهود
امفيت ما اتفرج يا كريم بعينة ++ نين جيش لسلام العظيم ايعود
وناخذو الثار ونهزمو غازينا ++ وانديرو لظلم الظالمين احدود
واندردو الحق لهله واراضينا ++ ويهلب البصرة جيشم مطرود
علل فى علل جبناه من تكوينا ++ وياسه ونيرانه هميل الهود
الغالى اللى وقتا ايبان جبينه ++ ابوارق اشالن فى مطر وارعود
هذاك هو اللى مسع غلاه انسينا ++ ولا لنا على غيره علل مجبود
وهذاك هو اللى مدفور وامخلينا ++ سمارة ويالانا الناس ارقود
...
يابوميامي سود ++ اتعبنا تعب واجد مشا فالهود ++ امعاك فالغلا ..
للشاعر عبد القادر بكار

ياما شايل - للشاعر محمد الشيخي

 يامه شايل **
احمول منعدل واحد و واحد مايل **
شديد شد حيل العقل **
شايل احمول اتشيّب *
اثقال غير ما منهن شكى لا ريّب **
ومامن صلايب عالحمول امطيّب *
ثقيل حملهن فوق الكتوف عدايل
وفيهن اللي له وقت موش اقريّب **
يزاقه مع زق العرا ايتمايل *
وانكان قالك صايد هناه و طيّب ** 
عليك ياكبير ,, العقل ,, غير ايحايل *
********
ما شكى من داهن ** 
احمول له زمان ايموج هو وياهن *
متصعد ابهن ما سال في مرقاهن **
ولا فى طريقه جن ادروب سهايل *
احمول وين ما مالن ايميل امعاهن **
علايل ايسوقن فى رحيل علايل *
واجروحه ضميد الوقت ما داواهن **
متقرض ابراس اجلمه دمه سايل *
وارياحه اتلاطش فى سحاب سماهن **
عليه من هناك ومن هناك ولايل*
واهموم وين هفنّه ايحوس امعاهن ** 
حوست بناتيل القصيل الحايل *
والله هو اللي قادر ايفك عناهن ** 
عظيم الرجاء فكاك كل وحايل *
******
يامه شايل **
احمول منعدل واحد و واحد مايل **
شديد شد حيل العقل **

انكانهن بكن خلهن علي راحتن

انكان هن بكن خلهن علي راحتن

وانكان سكتن مانكرهوا سكتتن

ع البكا مانابا

ننهاهن ونا مسع عرفت اسبابه

وانكانهن عطني جهوة الحطابه

سكرة ضحا اتسدني جهوتن

وانجيهن نهاري فوله وعقابه

بعدها تعتهن ياخذن غايتن

تعاتا الله ماقيهن اتفيض ارقابا

علي حيهن ولا علي ميتن

وعلي حي ميت دايرات احسابا

ماعمر زينا دار في جلوتن .. للشاعر صالح بوعياد الشهيبي

كلمات دلالية : الشاعر ، قصيدة ، قصائد


فعيونك خوف فعيونك افراح

فعيونك خوف فعيونك افراح

فعيونك ريت يامامن احزان  

كلا الخوف من كثرانطاح 

كل نهار مطري في مكان

 كلا الفرح لجل ظلم راح 

ابنصر الحق مرفوع الاذان

 اوكلا الحزن ودعتي ارواح

ارواح ضناك مدفوعه اثمان 

دفعتي اثمان تجري عالصلاح

تريدي دارفي برالامان

اتريدي انهو يادوبا كيف لاح

حس ارعدا يمخض في امزان

برق ارجاع في مقدم اسناح

هلي فيه ترجي لك زمان

ما بي مرض غير سرقة الثورة



ما بي مرض غير سرقة الثورة.. وقلبت الصوره ... من طاغي رحل وقعدوا أزلامه

ما بي مرض غير كذب الثعالب ... و كثر المطالب ... موجب و سالب ونسوا وطن كاحل ظلامه

ما بي مرض غير حسن التألق ... وفن التسلق ... و كذب و تملق علي دم واصل قدامه

ما بي مرض غير دم الشهيد ... و كم من فقيد ... غايب بعيد ترك أوطانه و قال السلامه

ما بي مرض غير دمع اليتامى ... و دهس الكرامه ... و وعود مجلس كاثر كلامه

ما بي مرض غير حب الكراسي ... و ضرب الجراسي ... و بحر غارق صاعب عوامه

ما بي مرض غير كثر الوعود ... و كذب الشهود ... و لبس الجرود من ناس ركبوا الموجه سنتين قامه

ما بي مرض غير سرقة المال ... و تهميش الرجال ... اللي علي الوطن ضحوا من أجل الكرامه

ما بي مرض غير ضرب الطبال ... وشح الحبال .. وقطع الاوصال من كمشة أندال سرقوا أحلامه

ما بي مرض غير سرقة الثورة ... وقلبت الصوره ... من طاغي رحل وقعدوا أزلامه



كلمات دلالية : قصيدة ، قصائد ، شعر شعبي ليبي ، ليبيا شعر وطن 

اسمى العاشق الموش معشوق


اسمى العاشق الموش معشوق* وأسمى رفيق الطلالى

أطلال وين مانجيهن أنروق *أنعاشق أرياح القبالى

أرياح وين مايهبن أنضوق* أمعاهن اطعمت الغوالى


أوياريت فال ما يبقئ صدوق* ويسر كل ماتمنالى


أن ماروحو نلحق اللحوق* أنضاف النياء والبذالى


ألى الوقت فيهم أيسوق* عدا أورهدن أجمالى


ألى أخطورهم تما خزوق* أخزوق دوجهم كى تهايالى


وأسمى العاشق المزموق* ألى ماعشق فيه وألى


وأسمى العاشق المسروق* أبشى من طفولة أجيالى


وأسمى العاشق ألى عاش* أمحقوق والحق لى أوماينعطالى


وأسمى العاشق ألى دوم مسبوق* على من تمناه بالى


وأسمى العاشق ألى عمر مايفوق* مطموس من أوكال البسالى


وأسمى عاشقآ شى ما يتوق* أولا يوم فارق خيالى


وأسمى عاشقآ باب أمغلوق *أتربسينا باللقفالى


وأسمى عاشقآ مزن وبروق* مليت من صهيد الشعالى


وأسمى عاشقآ عاش فى شوق *محروم من أيام الدلالى


للشاعر / صالح بوعياد
كلما



ت دلالية : قصيدة ، قصائد ، شعر شعبي ليبي